Lekgotla la Dipuo Tsohle tsa Afrika Borwa
Lekgotla la Dipuo Tsohle tsa Afrika Borwa (PanSALB) ke mokgatlo wa Afrika Borwa o thehilweng ho phahamisa botemengata, ho ntshetsa pele le ho boloka dipuo tsa semmuso tse 12, le ho sireletsa ditokelo tsa puo Afrika Borwa. Lekgotla le thehilwe ke Palamente ya Afrika Borwa ho latela Molao wa 59 wa 1995, jwalo ka ha o fetotswe.
Ntle le dipuo tse 12 tsa semmuso tsa Afrika Borwa, PanSALB e boetse e tsitlallela ho theha maemo bakeng sa tshebediso le ho ntshetsopele ya dipuo tsohle tse sebediswang ke setjhaba ka hara naha ho kenyeletsa Khoe, San le Nama.
Dibopeho tsa PanSALB di kenyelletsa: Dikomiti tsa Puo tsa Provense (diPLC), Meifo ya Naha ya Dipuo (Meifo), le Diyuniti tsa Naha tsa Leksikhografi (diNLU).
Tshebedisano ya SWiP
[fetola | fetola mohloli]Ka 2023, ho ile ha qalwa projeke ya tshebedisano dipakeng tsa PanSALB, SADiLaR (Setsi sa Afrika Borwa sa Disebediswa tsa Puo tsa Dijithale), le Wikimedia ZA ho ntshetsa pele tshebediso ya puo ho Wikipedia hammoho le boteng ba dipuo tsa matswallwa tsa Afrika Borwa sebakeng sa marangrang. Morero ona o kgutsufaditswe e le SWiP: o kopanya mabitso a SADiLAR, Wikipedia le PanSALB. Bankakarolo ba rutwa ka Wikipedia mme ba iswa thupellong ya bongodi e mabapi le mokgwa wa ho eketsa dikahare, diqotso le dinepe.
Dipuopuo
[fetola | fetola mohloli]Ka Pherekgong 2016, Letona la Bonono le Botjhaba la Afrika Borwa, Nathi Mthethwa o ile a qhala lekgotla lohle la PanSALB, kamora tlaleho ya hore dipakeng tsa 2014 le 2015, ditshenyehelo tsa tsamaiso tsa lekgotla di eketsehile ho tloha ho dimiliyone tse 8 ho ya ho dimiliyone tse 11 tsa diranta, ha ditshenyehelo tse amanang le thomo ya lona di theohile ho tloha dimiliyone tse 23 ho ya ho tse dimiliyone tse 17 tsa diranta.